Daginn það er hvassveður búið að vera í dag fór samt út og tók nokkrar myndir sem ég er búinn koma á netið í albúm annars allt gott ekki fokið neitt sem ég veit um

Óska ykkur gleðilegra jóla og farsældar á komandi ári, megi gleði og hamingja fylgja ykkur.

Hér eru hvít jól og Valli, Alla, Sigurður Kári og Sólveig María eru hjá okkur og verða yfir áramótin. Að venju var borðuð purusteik en hamborgarahryggur var líka á borðum. Sigurður Kári sá um að afhenda pakkana eftir að Nína Matthildur hafði lesið á gjafamiðana, annað fór fram að hefðbundnum hætti. Hlustað á jólamessu í útvarpi og s.v. fr.

Daginn
Það er búið að vera norðan 14 til 15 metrar í dag og kom með snjókomu í kvöld. Bía er þessa stundina í kennslu og ég því einn heima eins og er. Við kveiktum á kerti í gær til að minnast Kristins Veigars og vottum öllum aðstaðendum samúðar. Ég setti inn myndir frá Skarðsréttum 2007 í dag en er ekki búinn að fara yfir þær kannski þarf ég að kippa einhverjum út, það er allt gott að frétta af Hlyni og fjölskyldu í danaveldi. Ég hef verið inni í dag og unnið í þvottahúsinu á samt því að taka til niðri hjá mér henda gömlum bókhaldamöppum og fl. Ég er með þrjá 15" túpuskjái sem eru í góðu lagi ef einhver vill svona skjái  þá er bara að  hafa samband  áður en ég hendi þeim. Annað gengur sinn vanagang var að bóna gólf upp á sjúkrahúsi í gær plataði Bíu með mér í það tókum einn gang. Mamma hefur það ágætt heilsan bara góð hjá henni núna, talaði við hana áðan. Ég á nú eftir að fara tvisvar til Reykjavíkur í desember, var búin að tala við Lóa um að fá lánaða kerruna hjá honum þegar ég færi, en hann er í Reykjavík núna. Ég reyni að setja fleiri myndir inn bráðlega.

Daginn
Hlustaði nú á biskupinn með öðru eyranu í morgun. Það var ekkert rjúpnaveður í morgun vestan rok og rigning með slydduéljum. Ég fór í Skagafjörðinn í gær heimsótti Halla og frú á Enni  í Viðvíkursveit stoppaði það í rúmma klukkustund fór síðan heim aftur það var rok og rigning hluta af leiðinni. Skrapp norður í Odda í gærkveldi mamma var með svið í kvöldmatinn, Það hefur verið mikið um rjúpnaskyttur, en lítil veiði. Ég er búinn að fara einusinni og sá bara nokkur för en enga rjúpu enda hefur lítil veiði verið á þessum fyrstu dögum. Fer til Reykjavíkur í dag og kem heim á þriðjudagskvöld, en þarf að ljúka nokkrum verkefnum áður en ég fer. Nína og Gísli Mar komu á föstudaginn, Sigurður Kári og Sólveig komu í gær. 

Það er nú það eins og  maðurinn sagði eða greyin mín sagði faðir minn oft og mörgum sinnum. við okkur bræðurnar, en ég brá undir mig betri færtinum og lagði land undir fót og labbaði á Caffé Riis og fór á tónleika með Gumma Jóns það voru innan við 50 sem sóttu tónleikana en þeir voru mjög góðir og hristi Gummi þetta vel fram úr erminni, ég átti stutt spjall við hann og bað hann fyrir kveðjur til allra sem höfðu verið samtíða honum á Reykjaskóla sem voru frá Ströndum, taldi þá nú alla upp. Ok  það er heldur rólegt yfir mínu svæði þessa stundina ég ferðast fram og til baka um landið og tel mér trú um að ég hafi aldrei tíma til að rita hérna á síðuna mína. einhverjum lofaði ég að ég myndi klára að setja inn myndir frá Rússlandi  og réttunum en það verður aðeins að bíða. Stundum segi ég við sjálfan mig að "já ég geri hitt og þetta þegar brestur á bylur og vont veður" en ég verð sennilega að breyta þeirri hugsun og taka mig til í andlitinu og setja inn þessar myndir um helgi á einhverjum sólskynsdegi hérna á Hólmavík, en það er margt sem ég hefði viljað segja ykkur frá sumrinu en það verður að bíða betri tíma, bestu kveðjur

Daginn. Í gærkveldi eldaði ég sigin silung úr Mývatnssveit og bauð doktor Páli Þorgeirs í mat en hann er vanur svona mat en þetta var í fyrsta skipti sem ég borða sigin silung og kom mér alveg á óvart hvað hann var góður og meðlætið var kartöflur og smjör, einfalt það, silunginn fékk ég hjá Ingólfi á Helluvaði. Núna er sólskyn en smá gola og gróðurinn komin með haustliti.

Daginn oft hef ég ætlað að skrifa inn á síðuna en ekki komið mér að því þó að það sér auðvelt verk. Það hefur margt verið að gerast frá giftingu Hadda og Helgu en skrifa um það síðar, en í dag er búið að vera sæmilegt veður með rigningarskúrum, skrapp norður í Odda að spjalla við fólkið þar. skoðaði eldavélina en hún hefur víst verið í ólagi en sá ekket athugavert við hana hún virkaði alveg eftir að ég var búin að sétja hana saman, fékk 3 kg. af berjum í nesti heim og hef verið að borða þau, vandræðin í Odda eru þau að það eru engar krukkur á lausu undir berjasultu en aðalvandamálið er dráttarvélarleisið en hún er í viðgerð eftir bruna. Baldur var að taka upp kartöflur og lætur vel af uppskerunni, annars allt gott af þeim bæ. Ég fór á Aðalfund Skógræktarfélags Íslands sem haldin var á Eigilstöðum var þar ritari ásamt Friðriki Aspelund og á eftir að færa fundargerðina formlega inn í bókin en það verður fljótlega, einnig fór ég á Aðalfund Landsambands Skógareigenda og var einnig ritari þar ásamt Hallfríði Finnborgu, er  að ganga frá þeirri fundargerð en þetta eru fundargerðir upp á 12 til 15 blaðsíður. Hef ekkert sett inn af myndum núna en geri það síðar. Er að verða búinn að ganga frá girðingunni við gangstéttina en hurðin er einhvað snúin svo ég varð að skrúfa hana fasta til að reyna að rétta hana. Á Hólmavík er allt með svipuðu sniði, en ýmsu verður að fara að taka á í kauptúninu hérna, verð að ræða það næst þegar ég fer í pottinn en þar er lokað núna vegna viðgerða. Það er allt gott að frétta af fjölskyldunni sem flutti til Danmerkur eins og sjá má af þeirra heimasíðu, og ekki veit ég en að það sé allt gott af öðrum fjölskyldumeðlimum. Eitt verð ég að segja ykkur frá, það bilaði þvottavélin í sumar og urðum við hjónin að fjárfesta í annari vél það varð Mile vél fyrir valinu sögð endast í 20 ár, ég er bara ánægður með hana en það er helst að mig skorti þvott til að þvo, en það hlýtur að rætast úr því um réttirnar en þá á ég von á gestum, það verður að bjóða þeim upp á þvottaþjónustu. Nú er konan farin að tjá sig um háttatíma á þessum bæ þannig að ég verð núna að fylgja henni til hvílu. Bless í þetta sinn.

Það kom að því að Haraldur og Helga giftu sig. Séra Sigríður Óladóttir gifti þau í dag 07.07.07. í Hólmavíkurkirkju.

Það er búið að vera gott veður síðustu daga t.d. í dag upp í 18 stiga hita en sólarlaust, fór í gærkveldi að horfa á miðnætursólina og sólina koma aftu í ljós undan Kaldbakshorninu, var upp á Ennishálsi, nennti nú ekki norður en ef farið er norður á Reykjaneshyrnu þá sést sólin allan tímann. Fór Drangsneshringinn í dag, tók þá eftir að við Bassastaði er merki um 50 km. hámarkshraða síðan er skilti þegar komið er að Drangsnesi þá er komin 35 km. hámarkshraði, en þegar komið er út fyrir Drangsnes, þá er merki um að þéttbýli sé lokið þannig að eftir það er leyfður 80 km. hámarkshraði á mölinni, en ef þu ferð yfir háls þá er 50 km hámarkshraði það sem eftir er norður, Baldur Steinn var að veiða í Bjarnarfjarðará ásamt fleyrum, hann fékk væna bleikju 1 og 1/2 pund silfruð á litinn, það komu þrjár bleikjur úr ánni á gær.

60 Ársþing HSS byrjaði á Sævangi kl 18:00 og var lokið um 21:15. Það var góð mæting og hefðbundin þingstörf gengu vel, ég gaf ekki kost á mér lengur í stjórn og var því vel tekið. Nýja stjórn skipa Jóhanna Ása Einarsdóttir formaður, og aðrir í stjórn eru Aðalbjörg Óskarsdóttir, Rósmundur Númason, Ólafur Skúli Björgvinsson og Bjarnheiður Fossdal. Það er búið að vera mjög gott veður í dag og kvöld. Ég hef mest verði í að ganga frá reikningum HSS í dag til að leggja þá fyrir þingið. Bía er á Akureyri ásmt mömmu sinni og Erlu og er nú væntanleg heim á morgun er þá búin að vera í 14 daga útlegð.

Ég fór seinnipartinn á fimmtudegi á Bíldudal með Höllu og Lóa, framundan var að verja ritgerðina Strandavíðirinn í Selárdal sem var lokaverkefni mitt hjá Grænni Skógum. Ég var með gistingu í gamla kaupfélagshúsinu ásamt nokkrum öðrum. Á föstudagsmorgun var byrjað kl 09:00 í félagsheimilinu Baldurshaga ágætis aðstaða, en ekki netsamband, það var búið um kl 15:30 að flytja allar ritgerðirnar, síða var farið með bátnum Höfrungi BA inn í Geirþjófsfjörð en þar fór útskriftin fram og boðið upp á veitingar, sumir slóu upp tjöldum og gistu en aðrir fóru heim upp úr miðnætti, siglingin tók 1 og hálfan tíma. Í Geirþjófsfirði skoðuðum við fylgsnið hans Gísla Súrssonar og klettinn Einhamar en þar var bardagi mikill og lét Gísli þar lífið en stökk fram af Einhamri þá með yðrin úti, helt hann á sverði sínu og hjó mann í herðar niður að beltisstað og lá ofan á honum örendur. Valdimar fór með úrdrátt úr sögu Gísla, en ég lék í myndinni sem gerð var um sögu Gísla. Þessi út skriftarferð heppnaðist mjög vel, en það gátu því miður ekki allir komið í þessa ferð. Það eru myndir í myndaalbúminu sem skýra að hluta það sem fram fór.

Veðrið er búið að vera gott í dag, fór í gufu og pottinn kl. 19:30 það voru 2 börn og þrír fullornir fyrir utan mig, enda margir að heiman. Það gáar aðeins á fyrðinum núna og afli í dag var þolanlegur nema hjá einum bát, Ingimundur Ingimundarson er að setja upp niðjatalið, ég bað hann að breyta fæðingarstöðunum, hann virtist ekki skilja alveg að að það sem ég sendi honum ætti að standa, en það kemur nú í ljós, Bía og Nínurnar eru austur á Reyðarfirði að passa barnabörnin 5, Setti inn myndir sem ég tók í útskriftinni hjá Nínu, og einnig myndir frá Mývatni flugnasveimirnir eru áhugavert myndaefni.

Daginn er að ljúka við ritgerðina sem ég var að gera vegna grænni skóga. Er að finna tengil á hana.

Það líður oft lngt á milli skrifa hjá mér. Ég fór í afmælikaffi hjá Ernu í kvöld, tertur og drykkir. Fór einnig í sund og heitapottinn og heilsaði upp á Matta og ræddi um xið á morgun við hann það voru skiptar skoðanir, Það hefur verið kalt undanfarið en vonin er sett á miðja næstu viku um meiri hlýindi. Það er öll mín fjölskylda bókuð á ættarmótið á Skjöldólfsstöðum helgina 13 til 15 júlí vonandi geta nú flestir mætt þar. Ætla til Reykjavíkur á næsta miðvikudag, sennilega að mála bæinn. Sauðburður á að byrja í Odda eftir helgina, og þau eiga von á aðstoð að sunnan, eins og sagt er.

Það er ekki seinna vænna en að óska ykkur gleðilegs sumars. Hérna á Hólmavík er skítakuldi núna og norðan gjólu kaldi alskýað í tvöþúsund fetum og grár veðrabakki að sjá út í firði. Var í Reykjavík sumardaginn fyrsta og tók mig til og labbaði úr Hátúni niður Laugaveg og þaðan út á Granda að Seglagerðinni Ægi, ( fékk nú Bíu til að sækja mig þangað um kvöldmatarleitið ) Er nú búin að áhveða efnið í rtigerðina hjá mér ætla að skrifa um Strandavíðirinn í Selárdal, á um hann nokkuð efni frá fyrri árum þarf að skila þessari ritgerð 4. júní til að útskrifast um miðjan júní. Það er ekki fyrirsjáanlegt að sumarið komi hingað í þessari viku. Ég er langt komin með niðjatalið vantar örlítið upp á það þarf að fá meira aðsent efni. Það er hvass að norðan um kl 21 í Bjarnarfirði hitastigið var 3° á C